“Gub-a Ninyo ang Templo nga ini kag sa Sulod sang Tatlo ka Adlaw Patindugon Ko ini Liwat”
Ebanghelyo subong nga Adlaw (Juan 2:13-22)
Malapit na ang piesta sang mga Judio nga ginatawag nga Piesta sang Paglabay sang Angel. Gani nagpa-Jerusalem si Jesus.
Kag didto may nakita siya nga mga tawo sa templo nga nagabaligya sang mga inughalad nga mga baka, mga karnero kag mga pating. May mga tawo man didto nga nagapangbaylo sing kuwarta sa ila mga lamisa.
Gani naghimo siya sing halanot nga lubid. Pagkatapos, ginpanabog niya ang mga karnero kag mga baka paguwa sa templo. Ginpangwas-ag man niya ang mga kuwarta sang mga manugbaylo sing kuwarta kag ginpamaliskad ang ila mga lamisa.
Nagsiling siya sa mga nagabaligya sang pating, “Kuhaa ninyo ini diri! Indi ninyo paghimua nga balaligyaan ang balay sang akon Amay!”
Sa sining iya ginhimo, nadumduman sang iya mga sumulunod ang nasulat sa Kasulatan nga nagasiling, “Tungod sa akon pagpakamahal sang imo balay mapatay ako.”
Tungod sang iya ginhimo, nagpamangkot ang mga manugdumala sang mga Judio sa iya, “Ano nga milagro ang imo mahimo nga ipakita sa amon nga ikaw may awtoridad sa paghimo sini?”
Nagsabat si Jesus, “Gub-a ninyo ang templo nga ini kag sa sulod sang tatlo ka adlaw patindugon ko ini liwat.”
Nagsiling sila, “Ang templo nga ini ginpatindog sa sulod sang 46 ka tuig kag patindugon mo lang sa sulod sang tatlo ka adlaw?”
Pero wala sila nakaintiende, kay ang ginatumod ni Jesus nga templo amo ang iya lawas.
Gani sang nabanhaw siya, nadumduman sang iya mga sumulunod nga ginhambal niya ini. Kag nagpati sila sa gintagna sang Kasulatan kag ang iya ginsiling parte sa iya pagkabanhaw.
Click for the Meditation:
“Gub-a Ninyo Ang Templo Nga Ini Kag Sa Sulod Sang Tatlo Ka Adlaw Patindugon Ko Ini Liwat”
