“Kay Sila Nagapasulabi sa mga Butang diri sa Kalibutan mas Maalam Magpakigbagay sa Ila Isigkatawo sang sa mga Tawo nga Ginpasanagan na sang Dios”
Ebanghelyo subong nga Adlaw (Lucas 16:1-8)
Nagsugid si Jesus sang isa ka paanggid sa iya mga sumulunod. Siling niya, “May isa ka manggaranon nga may suluguon nga gintugyanan niya sang iya mga pagkabutang. Karon may nagsugid sa manggaranon nga ang iya mga pagkabutang ginausikan lang sang iya tinugyanan nga suluguon.
Gani ginpatawag niya siya kag ginhambalan, ‘Ano ining nabatian ko nga ginausikan mo lang ang akon pagkabutang? Maayo pa magsumahay kita parte sa akon pagkabutang kay halin karon pahalinon ko na ikaw.’
Tungod nga ginapahalin na siya sang iya agalon, nagsiling siya sa iya kaugalingon, ‘Ano bala ang akon himuon? Indi ako makasarang sang mabug-at nga obra pareho sang pagkutkot sang buho, kag nahuya man ako nga magpakilimos.
A, nahibaluan ko na kon ano ang akon himuon agod nga bisan pahalinon ako sang akon agalon may makadtuan ako nga mga tawo nga magabaton sa akon sa ila mga balay.’
Ang iya ginhimo, isa-isa niya nga ginpatawag ang mga may utang sa iya agalon. Nagpamangkot siya sa nahauna, ‘Pila ang imo utang sa akon agalon?’
Nagsabat siya, ‘100 ka lata nga lana sang olibo.’ Nagsiling ang tinugyanan sa iya, ‘Sige, yari ang imo resibo, pungko kag isulat 50.’
Pagkatapos nagpamangkot siya sa ikaduha, ‘Pila ang imo utang sa akon agalon?’ Nagsabat siya, ‘100 ka sako nga trigo.’ ‘Sige, yari ang imo resibo, isulat nga 80 lang ka sako.’
Pagkahibalo sang agalon sang iya ginhimo, gindayaw niya ang dayaon nga tinugyanan sa iya kaalam tungod nga nakapreparar na siya para sa iya palaabuton. Kay ang mga tawo nga nagapasulabi sa mga butang diri sa kalibutan mas maalam magpakigbagay sa ila isigkatawo sang sa mga tawo nga ginpasanagan na sang Dios.
Click for the Meditation:
