“Manugsukot sang Buhis kag mga Tawo nga Makasasala ang Nagpalapit kay Jesus sa Pagpamati sang Iya mga Pagpanudlo”
Ebanghelyo subong nga Adlaw (Lucas 15:1-10)
Madamo nga mga manugsukot sang buhis kag iban pa nga mga tawo nga ginakabig nga makasasala ang nagpalapit kay Jesus sa pagpamati sang iya mga pagpanudlo.
Nagkumod ang mga Pariseo kag ang mga manunudlo sang Kasuguan. Siling nila, “Ini nga tawo nagabaton sang mga makasasala, kag nagaupod sa ila sa pagkaon!”
Gani ginsugiran sila ni Jesus sang mga paanggid. Siling niya, “Halimbawa, may tawo nga may 100 ka karnero. Ang isa nadula. Ti ano ang iya himuon? Siyempre bayaan niya anay ang 99 sa halalban kag pangitaon ang nadula hasta nga makita niya ini.
Kon makita na niya magakalipay siya kag pas-anon niya ini pauli.
Pag-abot niya sa ila balay panawgon niya ang iya mga abyan kag mga kaingod kag magsiling, ‘Dali kamo, magkalipay kita, kay nakita ko na ang akon karnero nga nadula.’ “
Dayon nagsiling si Jesus, “Kaangay man sina didto sa langit. Mas dako ang kalipay tungod sa isa ka makasasala nga nagahinulsol sang sa 99 nga mga matarong nga indi kinahanglan nga maghinulsol.”
“Ukon halimbawa may isa ka babayi nga may napulo ka sinsilyo. Ano ayhan ang iya himuon kon madula ang isa? Siyempre sindihan niya ang suga kag silhigan sing maayo ang iya balay agod pangitaon ang sinsilyo hasta nga makita niya ini.
Kon makita na niya ini, panawgon niya ang iya mga amiga kag mga kaingod kag magsiling, ‘Magkalipay kita, kay nakita ko na ang akon sinsilyo nga nadula.’ “
Dayon nagsiling si Jesus, “Kaangay man sina ang kalipay sang mga anghel sang Dios sa langit kon ang isa ka makasasala maghinulsol.”
Click for the Meditation:
