“Kamo nga Ginpakamaayo sang Dios nga Akon Amay, Panublia Ninyo ang Ginharian nga Ginpreparar para sa Inyo Halin pa sang Pagtuga sang Kalibutan”
Ebanghelyo subong nga Adlaw (Mateo 25:31-46)
“Kon ako nga Anak sang Tawo mag-abot na bilang Hari, nga ginaupdan sang tanan nga mga anghel, magapungko ako dayon sa akon trono nga harianon.
Ang tanan nga mga tawo sa kalibutan pagatipunon agod mag-atubang sa akon. Dayon painon ko sila sa duha ka grupo pareho sang pagpain sang manugbantay sa mga karnero sa mga kanding.
Ang mga tawo nga kaangay sang mga karnero ibutang ko sa akon tuo kag ang mga tawo nga kaangay sang mga kanding ibutang ko sa akon wala.
Kag bilang Hari, magasiling ako sa mga tawo sa akon tuo, ‘Kamo nga ginpakamaayo sang Dios nga akon Amay, panublia ninyo ang ginharian nga ginpreparar para sa inyo halin pa sang pagtuga sang kalibutan.
Kay sang gin-gutom ako ginpakaon ninyo ako, kag sang gin-uhaw ako ginpainom ninyo ako. Sang nangin dumuluong ako ginpadayon ninyo ako sa inyo balay; sang wala ako sang bayo ginpabayuan ninyo ako; sang nagmasakit ako gin-atipan ninyo ako; kag sang ginpriso ako ginbisitahan ninyo ako.’
Dayon magasabat ang mga matarong sa akon tuo, ‘Ginoo, san-o ka bala namon nakita nga gutom kag ginpakaon namon, ukon nauhaw kag ginpainom namon?
San-o ka bala namon nakita nga nangin dumuluong kag ginpadayon ka namon sa amon balay, ukon wala sing bayo kag ginpabayuan namon?
San-o ka bala namon nakita nga nagmasakit ukon napriso kag ginbisitahan namon?’
Ako nga Hari magasabat, ‘Ang matuod, kon inyo ini ginhimo sa akon pinakakubos nga mga utod, pareho man nga ginhimo ninyo ini sa akon.’ “
“Dayon magasiling ako sa mga tawo sa akon wala, ‘Halin kamo diri sa akon, kamo nga ginpakamalaot sang Dios! Didto kamo sa kalayo nga nagadabadaba nga wala sng katapusan nga ginpreparar para kay Satanas kag sa iya mga anghel.
Kay gin-gutom ako pero wala ninyo ako ginpakaon, gin-uhaw ako pero wala ninyo ako ginpainom.
Sang dumuluong ako wala ninyo ako pagpadayuna sa inyo balay; sang wala ako bayo wala ninyo ako pagpabayui; pagmasakit ko kag sang pagkapriso ko wala ninyo ako pag-atipana.’
Dayon magasabat sila, ‘Ginoo, san-o ka namon nakita nga gin-gutom ukon gin-uhaw, ukon wala dalayunan, ukon wala bayo, ukon nagmasakit, ukon napriso nga wala kami nagbulig sa imo?’
Kag ako nga Hari magasabat, ‘Ang matuod, kon wala ninyo pagbuligi ang akon mga utod, bisan ang labing kubos sa panulok sang mga tawo, pareho lang ina nga wala ninyo ako pagbuligi.’
Kag ini sila pahalinon kag silutan sa wala sang katapusan. Pero ang mga matarong hatagan sang kabuhi nga wala sing katapusan.”
Click for the Meditation:
