“Magpangamuyo Permi kag Indi Magdula sing Paglaom”
Ebanghelyo subong nga Adlaw (Lucas 18:1-8)
Ginsugiran pa gid ni Jesus ang iya mga sumulunod sang isa ka paanggid agod tudluan sila sa pagpangamuyo permi kag indi magdula sing paglaom.
Nagsiling siya, “May isa ka huwis sa isa ka siyudad nga wala nagakahadlok sa Dios kag bali wala lang sa iya ang iya isigkatawo.
Kag didto man sa sina nga siyudad may isa ka balo nga babayi nga permi nagabalik-balik sa huwis sa pagpabulig sa iya sang iya kaso.
Sang premiro indi magbulig ang huwis. Pero sang ulihi tungod nga sige ang pagbalik-balik sang balo kag ginatublag siya permi, naghunahuna siya nga bisan wala siya nagakahadlok sa Dios kag bali wala lang sa iya ang iya isigkatawo, magabulig na lang siya agod indi na siya matak-an sa pagbalik-balik sang balo.”
Dayon nagsiling si Ginoong Jesus sa ila, “Ti nakita ninyo ang ginhimo sang huwis nga indi gani matarong?
Ang Dios pa ayhan! Indi gid mahimo nga indi siya magbulig sa kaso sang mga pinili niya nga nagapanawag sa iya sa adlaw kag gab-i. Sigurado gid nga indi niya sila pagpabay-an.
Ang matuod, buligan niya sila gilayon. Pero kon magbalik na ako nga Anak sang Tawo diri sa kalibutan, may makita ayhan ako nga mga tawo nga nagatuo?”
