“Ang Isa Kuhaon kag ang Isa Ibilin”
Ebanghelyo subong nga Adlaw (Lucas 17:26-37)
“Kon ano ang ginhimo sang mga tawo sang tiyempo ni Noe, amo man ang himuon sang mga tawo kon mag-abot na ako nga Anak sang Tawo.
Sang tiyempo ni Noe, wala na sang iban pa nga ginapinsar ang mga tawo kundi magpangalipay: sige lang kaon, inom, kag inasawahay hasta sa adlaw nga nagsulod si Noe sa arka. Dayon nag-abot ang anaw kag nalumos sila tanan.
Ang himuon sang mga tawo mangin kaangay man sang ginhimo sang mga tawo sang tiyempo ni Lot. Ang mga tawo sadto sige lang kaon, inom, pamakal, pamaligya, pananom, kag patindog sang ila mga balay.
Pero sang adlaw nga si Lot nakaguwa na sa Sodoma, nag-ulan didto sang kalayo kag asupre. Kag nagkalamatay sila tanan.
Amo man ina ang matabo kon ako nga Anak sang Tawo mag-abot na.
Sa sina nga adlaw, ang tawo nga yara sa guwa sang iya balay indi na dapat magsulod pa sa pagkuha sang iya mga pagkabutang. Kag ang didto sa talamnan indi na dapat magpauli pa sa iya balay.
Dumduma ninyo ang natabo sa asawa ni Lot.
Ang bisan sin-o nga nagatinguha nga indi madula ang iya kabuhi madula pa gani. Pero ang bisan sin-o nga nagasikway sang iya kabuhi tungod sa iya pagsunod sa akon makabaton sang kabuhi nga wala sing katapusan.
Ang matuod, sa sina nga gab-i, kon may duha ka tawo nga nagahulid nga nagakatulog, ang isa kuhaon kag ang isa ibilin.
Kon may duha ka babayi nga nagagaling, ang isa kuhaon kag ang isa ibilin.
[Kag kon may duha ka tawo nga nagaobra sa ila ginaobrahan, ang isa kuhaon kag ang isa ibilin.]“
Dayon nagpamangkot ang iya mga sumulunod, “Ginoo, diin bala ini matabo?” Ginsabat niya sila sa paanggid, “Kon diin ang may patay nga lawas, didto man nagatilipon ang mga uwak.”
Click for the Meditation:
